Il-Ġbir ta’ Skart Goff minn wara biebek

Ir-rimi ta’ skart goff minn dejjem kien ta’ problema għal dawk li kienu u għadhom konxji tal-ħtieġa li l-ambjent ta’ madwarna jinżamm nadif. Fortunatament, din il-mentalità kompliet tissaħħaħ matul iż-żmien u llum hawn kuxjenza fost il-maġġoranza tal-poplu Malti u Għawdxi. Iżda biex dan seta’ jsir, kien meħtieġ li jkunu provduti s-servizzi siewja ta’ ġbir.

Fejn jidħol l-iskart goff, illum kull ma trid tagħmel hu li ċċempel lill-Kunsill Lokali tiegħek, tagħtihom id-dettalji meħtieġa tal-iskart li trid jinġabar, u l-Kunsill jinfurmak mill-ewwel meta għandek toħorġu barra l-bieb tad-dar tiegħek. Hekk, tkun qed teħles mill-iskart b’mod l-aktar prattiku u effiċjenti. Kull ma trid sforz żgħir min-naħa tiegħek biex is-sistema tkompli taħdem bis-suċċess li għamlet s’issa. 

Dan is-servizz tal-Kunsilli Lokali ġmielu beda jħalli l-frott. Sparixxew ħafna mit-tbajja fi nħawi mwarrba mimlijin skart goff mixħut bl-addoċċ li sfortunatament kellhom għal żmien twil xi rħula u bliet. Għad baqa’ tbajja, u l-pjan huwa ċar: li dawn kollha jispiċċaw darba għal dejjem. B’risq ir-residenti nfushom u l-familji tagħhom.

Fejn jidħol l-iskart domestiku wkoll, b’seħħ minn Jannar 2023, il-ġbir u l-ġarr tal-iskart domestiku kollu beda jsir fuq bażi reġjonali u għalhekk tneħħiet l-anomalija li kienet teżisti dwar l-iskedi tal-ġbir tal-boroż b’modi differenti bejn il-lokalitajiet. Ir-riżultat kien li l-iskeda tal-ġranet u l-boroż li jridu jinħarġu bdiet tkun waħda uniformi.

Il-messaġġ ewlieni kien li Malta u Għawdex ikollhom sistema waħda ta’ ġbir tal-iskart, sistema li taħdem fil-prattika u effiċjenti. Nibżgħu għaliha. Aktar ma n-nies tifhem u tapprezza kemm siewi u meħtieġ huwa dan is-servizz, iktar ikollna triqat u pjazez nodfa biex jitgawdew mir-residenti u t-turisti jżurhom.