Trasport b’xejn għall-anzjani u persuni vulnerabbli
Il-komunità fl-ibliet u rħula hija magħmula minn ġenerazzjonijiet differenti li kollha għandhom il-ħtiġijiet tagħhom, b’mod partikolari l-anzjani u l-persuni vulnerabbli. Bil-għan li f’kull lokalità jitkattar aktar is-sens ta’ anzjanità attiva u indipendenti fil-komunità. Illum huma ħafna l-Kunsilli Lokali li joffru servizz ta’ trasport b’xejn kemm għall-anzjani kif ukoll għal persuni vulnerabbli, dejjem bil-għan li jkunu jistgħu jagħmlu diversi qadi ta’ kuljum.
Minbarra li jagħti lill-anzjani u l-persuni vulnerabbli l-kapaċità li jibqgħu fi ħdan il-komunità waqt li jinqdew mingħajr tfixkil jew tbatija, is-servizz ta’ trasport b’xejn inaqqas ukoll il-piż minn fuq il-qraba u carers tagħhom. Kull ma jkun hemm bżonn hija ċempila lill-Kunsill Lokali tal-lokalità tiegħek.
Dan is-servizz seta’ jibda jingħata u jitwessa’ bis-saħħa ta’ fondi diversi lill-Kunsilli Lokali f’Malta u Għawdex bil-ħsieb li jkunu jistgħu jinvestu f’karozzi u vannijiet meħtieġa biex joffru dan it-trasport.
L-inizjattivi f’dan il-qasam kienu diversi, fosthom għotja mill-aġenzija LESA lill-Kunsill Reġjonali tan-Nofsinhar għax-xiri ta’ vann elettriku sabiex jintuża għal skopijiet tal-komunità f’xejn inqas minn tnax-il Kunsill Lokali fir-reġjun. Ftit tax-xhur qabel kien imiss lill-anzjani u l-persuni b’diżabilità f’Raħal Ġdid (Paola) li jibdew igawdu minn trasport b’xejn provdut fuq vann elettriku u aċċessibbli b’rampa bis-saħħa ta’ fondi Norveġiżi u tal-Kunsill Lokali. Għajnuna fil-kisba ta’ vannijiet u karozzi elettriċi ngħatat ukoll lill-Kunsilli Lokali ta’ Ħal Lija, l-Ħamrun, u l-Kalkara fost l-oħrajn.
It-trasport b’xejn għall-anzjani u persuni vulnerabbli jirrifletti d-dritt ta’ kull persuna li tgħix ħajja indipendenti fi ħdan dik il-komunità li fi ħdanha tat is-sehem tagħha u kibret fil-għożża tal-familja, ħbieb, u ġirien. Fl-istess ħin tkun qed titjieb il-kwalità tal-ħajja u l-għajxien sostenibbli fil-komunità.
