Il-Bord dwar Gvernanza Lokali huwa korp statutorju indipendenti mwaqqaf skont l-Att dwar il-Kunsilli Lokali u rregolat mir-Regolamenti dwar Bord ta’ Gvernanza Lokali. Il-Bord huwa fdat bir-responsabbiltà li jħares il-governanza, ir-responsabbiltà, it-trasparenza u l-kodiċi tal-etika fi ħdan is-settur tal-gvern lokali f’Malta.

Il-bord għandu l-funzjoni li jinvestiga ilmenti u każijiet ta’ allegat amministrazzjoni ħażina, ksur tal-Kodiċi ta’ Etika jew irregolaritajiet marbuta mal-operat tal-gvern lokali. Dan jinkludi lmenti kontra rappreżentanti eletti, Segretarji Eżekuttivi u uffiċjali oħra, kif ukoll deċiżjonijiet ta’ gvernijiet lokali li jistgħu jkunu wasslu għal inġustizzja, irregolarità jew abbuż, sakemm il-każ ma jkunx ta’ natura kriminali; kif ukoll it-tressiq ta’ rakkomandazzjonijiet immirati biex isaħħu l-istandards u l-fiduċja tal-pubbliku fl-istituzzjonijiet tal-gvern lokali.

Permezz tar-rwol regolatorju u ta’ sorveljanza tiegħu, il-Bord jikkontribwixxi biex jiġi żgurat li l-awtoritajiet lokali joperaw b’mod responsabbli, trasparenti u ffukat fuq il-ħtiġijiet taċ-ċittadini.